BEKENDE GESIN VERTREK

Van ous Ou Testament redaksie

UR. – Die stad het vanoggend vroeg hier afskeid geneem van Tera seun van Nahor en sy hele familie, wat sak en pak vertrek het na Kanaän.

Die gesin was ’n tyd gelede ook in die nuus vanweë een van die seuns, Abram, se aanspraak dat hy die enigste ware God ontmoet het, en dat die ander gode niks anders as “menslike uitdinksels” is nie. Volgens Abram is sy besluit om te trek ’n direkte gevolg van die ontmoeting met sy God. God sou glo vir hom die opdrag daartoe gegee het. “Ek is hartseer om my geliefde geboortestad vaarwel toe te roep, maar as God roep, kan ek nie eintlik anders as om te gehoorsaam nie,” het hy opgemerk.

Hy is nog nie seker waarheen sy reis hom sal neem nie, het hy gesê, en bygevoeg dat God vir hom na sy bestemming sal lei.

 

Jesus wys ryke weg

Van ons Nuwe Testament redaksie

JORDAANVALLEI. – Die omstrede rabbi Jesus van Nasaret het sy volgelinge vandag hewig ontstel toe hy ’n baie belowende jongman ontmoedig het om hom te volg.

Anders as die meeste ander volgelinge van Jesus het hierdie jong man hom uit sy eie by Jesus kom aanmeld. Jesus het gesê dat hy hom alleenlik kan volg as hy eers al sy besittings verkoop en die geld vir die armes gegee het. Soos te verwagte, het die jongman nie vir dié eis kans gesien nie en teleurgesteld omgedraai.

Judas Iskariot, die dissipel wat vir hulle geldsake verantwoordelik is, het agterna vir ons verteenwoordiger gesê hy meen dit is baie onverantwoordelik van Jesus om die man op hierdie manier te behandel. “Dit was ’n baie ryk man. Dink net wat kon hy vir ons vorentoe beteken het. Ons sukkel juis so om kop bo water te hou,” het hy gesê.

 

Christenleier in hof

ROME. – ’n Bekende leier van die godsdienssekte wat hulleself “Christene” noem, verskyn môre hier in die keiserlike hooggeregshof op aanklag van insurgensie en hoogverraad.

Die beskuldigde is ’n Jood genaamd Saul van Tarsus, ook bekend as Paulus. Hy het etlike jare lank die Romeinse Ryk deurkruis en sover hy kom, mense tot die Christendom probeer bekeer. Sy veldtogte het hom egter dikwels in botsing gebring met ortodokse Jode en selfs ook aanhangers van ander godsdienste. Die onrus wat hy veroorsaak het, het uiteindelik tot sy inhegtenisneming gelei.

In ’n verrassende aankondiging vanoggend het Paulus bekend gemaak dat hy nie meer in die saak bygestaan sal word deur sy volgeling en medewerker van baie jare, Demas, nie. Hy sal nou sy verdediging alleen behartig.

 


Om oor na te dink

Om die Here te volg, het veel meer implikasies as wat ons graag wil weet. Dit vra ons hele lewe. Dit vra dat jy jouself sal prysgee; jou eie drome en ideale en gemak; soms selfs jou tuiste en jou mense, soos Abraham en Sara uitgevind het.

Daarom is dit goed, nee, noodsaaklik, om die prys te bereken voordat jy op sy roepstem antwoord. Jesus het ons immers in Luk. 9:62 gewaarsku: “Iemand wat die hand aan die ploeg slaan en aanhou omkyk na wat agter is, is nie geskik vir die koninkryk van God nie.” So dink mooi, want Hy roep jou om Hom te volg, nie om in ’n luilekkerland te bly nie. En die prys om Hom te volg, ís hoog. Ons het in die Bybel talle voorbeelde van mense wat nie daarvoor kans gesien het nie, soos die ryk jongman, en Demas.

Die bekende Duitse teoloog Dietrich Bonhoeffer het gesê, as Christus jou roep om Hom te volg, roep Hy jou om te sterf. Dit kan letterlik waar word, soos in Bonhoeffer se geval, of Paulus en al die ander martelare. Gelukkig is dit nie vir ons almal so nie. Maar wat van ons almal waar is, is dat ons moet sterf aan ons eiebelang, ons selfsug en selfgerigtheid. Want as Jesus jou Here en Koning is, kan jy nie meer jou eie baas wees en jou eie lewe reël nie. Johannes die Doper het dit goed raakgevat in Joh. 3:30 toe hy gesê het: “Hy moet meer word en ek minder.”

Jesus het dit natuurlik self ook gesê (Matt. 16:24): “As iemand agter My aan wil kom, moet hy homself verloën, sy kruis opneem en My volg …”

Jy het geen waarborge van ’n gemaklike lewe as jy besluit om Jesus te volg nie, behalwe dat God by jou is, ook in die donker dieptes (Psalm 23:4), of, in Paulus se woorde, dat Hy naby jou is (Fil. 4:5). Vir dié wat besluit het om tóg die Here te volg, ontdek weldra dat dit meer as genoeg is.

image_pdfimage_print

Lewer kommentaar

Volg my

Kry kennisgewings