Hemelse Vader,
ons dank U vanoggend met blydskap omdat U ons geskik gemaak het
om deel te hê aan die erfenis wat vir die gelowiges wag in die ryk van die lig.
Dankie, Here, dat U ons uit die mag van die duisternis weggeruk het
en ons onder die heerskappy van u Seun wat U liefhet, gestel het.
Dankie, Here Jesus, dat ons deur U die verlossing kon verkry, die vergewing van ons sondes.
Dankie dat ons nie vasgevang is in die magte van die Bose nie.
Dankie dat ons kan leef as mense wat weet dat Christus die oorwinning oor Satan behaal het,
dat ons verlos is.
Help ons, Here, om dit te onthou elke dag.
Help ons om met hoop in die hart te lewe in ’n stukkende wêreld.
Ons bid, Here, dat U deur al die wysheid en insig wat die Gees gee,
ons sal help om u wil duidelik te ken,
sodat ons tot u eer sal lewe deur net te doen wat U verlang.
Gee, Here, dat ons lewens vrugte sal dra deur goeie werke,
en dat ons sal toeneem in ons kennis van U.
Help ons, Here, deur u wonderbare krag,
en gee ons die sterkte om in alle omstandighede geduldig te volhard.
Amen.
