Hoofstuk van die dag: Inleding tot Johannes 13-21
Hierdie videotjie bied ’n mooi opsomming van die tweede deel van die Johannes-Evangelie. Kyk gerus daarna.
Hoofstuk van die dag: Johannes 12
Dít verseker Ek julle: As ’n koringkorrel nie in die grond val en sterwe nie, bly hy net een; maar as hy sterwe, bring hy ’n groot oes in. (vers 24)
Ek dink een van die groot probleme waarmee ons sukkel, is om die reikwydte van God se verlossing mooi te snap. Niks minder nie as die hele wêreld, elkeen wat glo, is in God se oog. So lief het God _die wêreld_ gehad (Joh 3:16).
Om dit te kon doen moes Jesus sterf (vers 24). Dit is God se resep vir nuwe lewe en vrug. En dis hierin wat ons Hom moet navolg: dat ons nie onsself en ons eie persoonlike voordeel voorop moet stel nie, maar weg van onsself moet kyk, die wêreld in die oog moet kry, soos Jesus.
Ons moet dit goed hoor – vrug kom deur te sterf aan jouself. Ons lewens sal net vrugbaar wees as ons Jesus volg. Ons getuienis sal net vrugbaar wees as ons weg van onsself wys na die Lam van God wat die sonde van die wêreld wegneem. As Hy meer word en ons minder.
Om Jesus te volg, verg jou hele lewe. Bedink dit vandag opnuut.
Hoofstuk van die dag: Johannes 11
Toe Jesus haar sien huil, en dat ook die Jode huil wat saam met haar gekom het, het dit Hom hewig ontstel, en Hy het diep bewoë geword. (vers 33, 2020-vertaling)
Het jy al gewonder hoe God oor die dood voel?
Hier kry ons so ’n klein kykie in God se hart, as Jesus by die graf van ’n vriend van Hom staan en saam met hulle huil (33, 35, 38). Vir God is die dood van ’n dierbare nie maar net een van daardie dinge wat ook weer sal verbygaan nie. Want ons smart gryp Hom aan die hart.
Verder, as Johannes hier skryf dat Jesus gehuil het, gebruik hy ’n baie sterk uitdrukking wat nie in ons Afrikaanse Vertaling so duidelik uitkom nie. Die 2020-vertaling vertaal: “diep bewoë” en “hewig ontsteld”. Ons sou ook kon vertaal: Hy het kwaad geword, of: Hy het in opstand gekom.
Jesus is woedend, want die dood breek God se skepping stukkend. Hy is in opstand, want dít is nie hoe God die wêreld gemaak het nie.
Jesus kom in opstand teen die heerskappy van die dood, só in opstand dat Hy die dood oorwin, dat Hy self opstaan uit die dood, en ons met Hom saam!
Hoofstuk van die dag: Johannes 10
My skape luister na my stem; Ek ken hulle, en hulle volg My. (vers 27)
Daar is vandag talle stemme wat na ons roep; stemme wat beweer húlle is die regte stem, húlle weet waar die groenste weiveld is en waar die water die soetste is. Verleidelike stemme. Stemme wat sê die kerk se leer oor sonde is net bedoel om ons pret te bederf. Stemme wat sê jy kan nie die kerk vertrou nie want die kerk het in die verlede al baie foute gemaak.
Daarom is mense vandag meer verward as ooit. Talle sê hulle weet nie meer wat om te glo nie, want dié een sê sus en daardie een sê so. Dié een sê kinderdoop en daardie een sê grootdoop. Dié een sê gays gaan reguit hel toe en daardie een sê daar is niks mee verkeerd nie.
Die vraag is: Na wie moet jy luister? Na die kerk, wat dit in die verlede ook al mis gehad het? Na dominees wat ook soms struikel?
Daar is net één antwoord: Jy moet die stem van die Herder self ken. Of liewer: Jy moet die Herder persoonlik ken. Dan sal jy sy stem herken. Dan sal vreemde stemme jou nie weglok nie.
Hoofstuk van die dag: Johannes 9
Sy dissipels vra Hom toe: “Rabbi, deur wie se sonde is dit dat hierdie man blind gebore is: sy eie of sy ouers s’n?” (vers 2)
Ons is van nature geneig om ’n oorsaak vir alles te soek. Iemand moet die skuld kry. As jy aan ’n ernstige siekte ly, moet daar fout wees met jou, want Jesus wil tog vir ons die lewe skenk, en dit in oorvloed (Joh 10:10). Só vererger ons mense se lyding, soos Job jou goed sal kan vertel.
Of dalk is God die oorsaak van jou ellende? Bely net jou skuld, dan sal Hy jou genees!
Kitsantwoorde help ons nie. Daarom verwerp Jesus hierdie soort redenasie. Dit help nie om te vra hoekom dit of dat oor jou gekom het nie, want ons kry gewoonlik nie ’n antwoord daarop nie (behalwe natuurlik as jou verkeerde leefstyl jou siek gemaak het).
Die hoekom-vrae bring ons nie verder nie. Jesus sê ons moet eerder die hoe-vraag vra: Hoe kan ek te midde van my probleem of siekte God verheerlik (vers 3). Hoe kan ek deur die manier waarop ek my kruis dra die lig op Jesus laat val?
Dís ’n vraag waarmee Jesus jou kan help!
Hoofstuk van die dag: Johannes 8
Wie ’n kind van God is, luister na die woorde van God. Juis daarom luister julle nie, omdat julle nie kinders van God is nie. (vers 47)
Hoekom behandel Jesus die mense wat aan sy kant was, so stief? Was Hy dan nie bly dat daar minstens ’n klomp mense was wat nie saam met die godsdienstige leiers sy dood beplan het nie?
Vir Jesus was dit nie genoeg dat hulle graag geluister het na hoe Hy preek nie. Hy sê vir hulle as Hy na hulle lewens kyk, lyk dit nie of God hulle Vader is nie, want Hy sien niks van God in hulle nie. Hy sien nie liefde by hulle nie, maar haat. Hy sien nie gehoorsaamheid nie, maar opstandigheid. Hy sien nie sagtheid en deernis en omgee nie, maar veroordeling en meerderwaardigheid. Daarom sy verdoemende oordeel: “Julle is kinders van die duiwel; hy is julle vader…” (vs 44).
Ek wonder wat Jesus vir ons sou sê. Lyk ons soos God? Doen ons soos God? Wat sal mense van ons hemelse Vader sê as hulle uit ons lewens moet aflei wie Hy is? Sal hulle sê ons het ’n Vader wat omgee? ’n Vader wat deernis het met die swakkes en die gebrokenes?