Dawid, gesalfde van die Here
Die dramatiese verhaal van koning Dawid en sy seun Absalom, wat uiteindelik lei tot Absalom se staatsgreep.
Die Antichris
Die laaste boek in die eindtydroman-trilogie. Die ander twee is “Soos ‘n engel van die lig” en “Soos ‘n brullende leeu”.
Die Bybelroman (God se storie)
Die Bybelroman is verhaal van die Bybel van Genesis tot Openbaring, oorvertel in romanvorm. Dit is in twee volumes verdeel; Genesis tot met Jesus se hemelvaart (Vol 1; 488 pp) en ná hemelvaart tot by Openbaring (Vol 2; 369 pp), so jy sal lekker lees, en sodoende ‘n oorsig oor die hele Bybelse verhaal kry.
Die dromer
Josef se storie.
In die Bybel is daar min verhale wat ’n mens so aangryp en ontroer soos die Josefverhaal. Die Josefverhaal is egter baie meer as net ’n Aspoestertjiestorie. Want die verhaal gaan nie net oor die wedervaringe van Josef nie. Dit gaan selfs nie eens in die eerste plek oor Josef nie. Dit gaan oor God se handelinge met sy volk.
Met hierdie fassinerende weergawe van een van die mees geliefde helde van die Ou Testament, plaas Jaco Thom die bekende Bybelse gebeure in ’n nuwe perspektief: dat ’n mens nie ander mense wat jou seergemaak het tot ’n skuldbelydenis kan dwing en dink jy gaan só tot versoening kom nie. Egte versoening en vergifnis kom as jy jou arms oopgooi en mense na jou toe trek voordat hulle nog om vergifnis (kon) vra.
Die goewerneur
Hierdie een is een van my gunstelinge, oor Nehemia. Siestog, die stomme goewerneur was taamlik eksentriek en het baie persoonlike uitdagings gehad. Ek het baie van hom gehou.
CBSA-toekenning vir Beste Publikasie in die kategorie “Fiksie” (derde plek)
Die Hemelbodes
‘n Roman oor engele in diens van God en die mens
Die boek vertel die verhaal van die wêreld, van die skepping tot met die wederkoms, gesien vanuit die perspektief van die engele.
Die Hervormers
Die verhaal van Nehemia en Esra. Dit is ‘n saamgestelde van die oorsponklike “Die Goewerneur” en ” Die Skrifgeleerde”. Saam het hulle ‘n algehele hervorming van die Joodse samelewing en godsdienstige lewe bewerkstellig.
Die skrifgeleerde
Opvolg op my roman Die Goewerneur. Dit gaan oor die werk van die priester Esra, wat saam met Nehemia ‘n hervorming bewerkstellig het.
Die verhaal van Dawid
Teen die agtergrond van die politieke en godsdienstige onrus van die Ou Testamentiese tyd kon dié verhaal maklik ’n hoofberig in vandag se koerant gewees het.
Bendeleier, egbreker, moordenaar …
Maar ook koning, psalmdigter en man na God se hart.
Deur al die wisselvallighede van sy lewe het Dawid lojaal gebly aan Jahwe sy God. In alles het hy op Jahwe en sy beloftes alleen vertrou. Selfs toe hy gruwelik gesondig het en gestraf is, het hy sy oog op Hom gevestig gehou.
In hierdie verbeeldingryke, Woordgetroue weergawe van die geskiedenis van een van die bekendste konings in die Ou Testament, kry Dawid gestalte as ’n gewone man wat buitengewone dinge gedoen het. Sy strewes, tekortkominge en verhoudings met die talle karakters wat deel is van sy verhaal, maak hom iemand met wie moderne mense hulle kan vereenselwig.
Die verhaal van DAWID bring hoop vir mense wat duisende jare ná hom leef. God gebruik steeds mense wat soms struikel om sy werk te doen. ’n Diep geestelike verhouding met ons Skepper is ook vir ons moontlik soos dit vir Dawid was.
Hierdie grootse verhaal van liefde en geloof uit die antieke geskiedenis word op ’n vars manier aangebied vir mense wat in die onstuimige tye van die 21ste eeu leef.