Lees ook
Ter wille van my Naam bedwing Ek my toorn, ter wille van my eer tree Ek nie op teen julle nie dat julle nie vernietig word nie. (vers 9)
Wanneer God na sy mense kyk, is daar baie wat Hom ontstel: hulle aanbid Hom nie eerlik en opreg nie (vers 1); hulle is hardkoppig en weerbarstig (vers 4); van geboorte af is hulle al oortreders (vers 8).
Ek wonder dikwels wat God sien as Hy na óns kyk. Dieselfde, en nog meer? Beslis. Ons het immers nie die sondeval vrygespring nie (al is daar deesdae mense wat beweer die sondeval is sommer nonsens); ons is van ons geboorte af met sonde belaai, soos Dawid in Ps 51:7 bely.
En tog, te midde van die verdoemende uitspraak van God oor Israel staan in vers 9: “Ek tree nie op teen julle dat julle vernietig word nie.” Dís genade. Onverdiende guns. God spaar ons, nie oor wie óns is nie, maar oor wie Hý is: “Ter wille van Myself en daarom alleen,” sê Hy in vers 11.
Ek weet nie van jou nie, maar ek staan verstom oor wie God is, en is vervul met verwondering en dankbaarheid.
Views: 92
Goeie more
Dankie Jaco…besef net weer hoe GROOT GOD SE GENADE IS.
Wonder baie dae hoeveel keer vee Hy trane van hartseer af oor sy kinders wat Hy so lief het so balhorig kan wees.
Dankie vir jou saam lees in die Bybel.
Blessings
Dankie ook van my, Jaco, dat jy ons telkenmale herrinner hoeveel genade God ons skenk. Ek dank ook ons Vader vir groot Christene soos jy. Dit beteken oneindig baie vir my spesiaal omdat so weinig openlik bely en nie van God wil hoor nie, maar skepties is 😢
God seën jou altyd.
Ek het ‘n vriend gehad wat my eenkeer getroos het nadat ek aan die hand van ‘n gelowige baie seer gekry het. Hy sê toe: “Sedert die Here Jesus Malgus se oor genees het nadat Petrus dit afgekap het, moes Hy al baie wonde genees wat deur sy eie kinders veroorsaak is.”